ILUH NA MARSOMBUH SIHOL

Tubuma Dingin-dingin, di paranggiran Namboru Deang Namora

Pirma tondi Madingin, horas, magira hita boi Mamora

Oh...ale boru na uli basa, hot ma pasu pasu mi, di hami sude pinaranggim di Bona Pasogit nang di tanoh parserakan, Poda na pinasahatmu ale sahala na marsangap, hu sude Pinompar ni Oppung Bolon Oppung Raja SilahiSabungan, naikkon Somba Marhulala jala manat di akka na marpariban, marsitogu toguan, Marsiamin aminan, marsihaholongan, anggiat ma sude tona dohot akka nadenggan poda ni sahala boi ni dalakkon dohot sude pinaranggim.

Mauli ho ale Naburju, tolhassonma ulimi di hami akka nanihaholonganmu, akka na marningot di uju ni ngolum. 

Dang di ida simalolong, alai digorak ni partondian..., iring do ho ale sahala na Marsangap,

Toho ma ho boru ni Raja, tinubuhon oppung boru na marlambas ni roha, namanghokop Pinomparna im Oppung boru, Pinggan Matio  Boru Padang Batang Hari.

Jujur di pambaenan, tangi di namarpangidoan.

Ilu na marabur uju i, jadi aek naPalam lam pusu pusu di akka na mauas di holongmu, siat marpangidoan do ho ale Sahala na Marsangap tu Oppung Mula JadiNabolon.

NaTaSiNa.......................Nauli Tao Silalahi Nabolak

Andung niSi boru Sasada di  NaTasiNa

I…..ale Oppung Mula Jadi Nabolon,

sugari diboto Pinompar ni Damong na adong arsak ni tondiku di partikkianon

ala ni turiturian nasailaon. ,

au ma nuaeng na sai marsak jala ngalutan di Partondian on,

sotung ma  tu hamagoan  ujungna”, .

“Nunga gok hinalungunni tondiku ale akka haholonganku,

di sigat sigat hamu di halungunanku hu pinaribothu,  siampudan ni Amongki.

Ai so haputihan songon na seang I sihol hu uju ni ngoluku,

bagian ni turpuk uju ni ngolu, Pinatoru ni sibaran na so martudosan i.

Nunga ditudos siaginon au da Pinompar ni Damongku

tu najojak tandol i, na so boi tarnenep dirindang ni sibalunon i.

Juguk di batu napir paimahon tampuk ni pusu pusuki,

boha ma pandungdunghu na soada gala i,

boha ma pangallunghu di na so haabaraanhi.

Ponjot so nabolon do au, sungkot so naginjang i,

tudia pe au sai di paihut ihut linang linang simalolong ni inongki,

Mangandung ma au di Sipareon ni Amongku,  

mauas aru aruku, hinaluhaluan ni parsalisihan akka pinariboti,

ue lungun nai lungun na soada tudosan di sulubalang ari namangilas i.

Dang tarturihon hinalungun ni si boruadi,

dung di padukkar dukkar hamu sidangolonki,

nabagas so tardodo song alup ni silumanlan i.

Dang hasaeman sidangolon songon begu na laos i,

dohot siak ni bagi na ampe di abarangki.

Nunga songon jarohak nataruntul au da Amongku Raja Na Marsangap,

o ale Inangku na maniroi luhut luat ni Pinomparmu,

songon ansuan na tarbatu i. Najagar tindang do au songon pangunggasan,

na jagar hundul songon panghulhulan i. Naborat so hallungon ma au, na dokdok so jujungon i,

na nididang madabu di tonga ni namailibulungi ,ala disigat sigat hamu  ribak ni ulos parsaoranni”

Ditambol lombu nabolon ndang mardai sira.

Andorang so niida sun hinalobina.

Masa ma ulaon ala ni hapistaran muna,  ndang pola ro didia.

Ro ma panolsolion ni barita

Di Panakok hamu ma hape   hu topi tao nabolak,

tapukk nipusupusu ni inongku, hasian ni tondiku

Dang I Na huparsitta, Dang I Upah ni ilu…,

Manat ma hamu ue….., haholongan

Rundut bonang, idaon tu punsuna.

Litok aek idaon tu soksokna.

Marabur ma  na ujui ilu ni siboruadi,

Umbaen dang jumpang be hu na pinagodang godang ni simarpangido,

Dang tolap sipareon manangi nangi

Andung ni Dainaang da patarus tarushon tappuk ni Pusupusuna

Ilu ni Dainang na gabe songon Binanga bolon, ido naso tarpaida ida simalolongku

Manimbil ma au sian biluk parsaktian

Unang hu ida abur ilu ni Inongku,

Unang hu ida linang ni simalolong ni Amongku,

manaon mangolati ruar ilu… marsigogo mangambati

 Bersambung.....,

NaTaSiNa